सुखी नेपाली, समृद्ध नेपाल अभियान सफल पार्न सहकारीको मुख्य भूमिका : पोखरेल

ललितपुर, २६ पुस  । उप–प्रधानमन्त्री तथा रक्षा मन्त्री इश्वर पोखरेलले नेपाल सरकारले ल्याएको सुखी नेपाली : समृद्ध नेपालको नारालाई व्यवहारिक रुपमा कार्यान्वयनका लागि सहकारी क्षेत्रको भूमिका प्रभावकारी हुने बताउनु भएको छ । राष्ट्रिय सहकारी बैंक लिमिटेडको १५ औं वार्षिक साधारणसभाबाट निर्वाचित सञ्चालक समितिका पदाधिकारी तथा सदस्यहरुलाई बिहीवार आफ्नै निवासमा वधाई ज्ञापन गर्ने क्रममा उहाँले यस्तो बताउनु भएको हो ।

 

सरकारले ल्याएको नीतिलाई व्यवहारिक रुपमा कार्यान्वयनका लागि सहकारीको गतिलाई तिब्र पानु पर्नेमा जोड दिदै उहाँले सहकारी क्षेत्रमो रहेको श्रम, सीप र पूँजिलाई उत्पादन र रोजगारी निर्माणमा केन्द्रीत गर्न सुझाव दिनु भयो ।    सहकारी क्षेत्र वृहत बनी सकेको, पूँजि निर्माणको क्षेत्रमा यसले राम्रो काम गरेको स्मरण गर्दै उपप्रधानमन्त्री पोखरेलले अब समाजवाद निर्माणको अभियानमा सहकारी राज्यको अत्यन्तै सहयोगी र समन्वयकारी निकायका रुपमा स्थापित हुने गरी काम गर्न सहकारीकर्मीहरुलाई आग्रह गर्नु भयो ।

 

सहकारी क्षेत्रको एक मात्र बैंकलाई प्रभावकारी बनाउन सरकारको तर्फबाट सक्दो पहलकदमी गर्ने भन्दै उहाँले सहकारी क्षेत्रलाई आवश्यक सीप, प्रविधि, पूँजिका लागि सहकारी बैंक र नेपाल सरकारबीच सहकार्यमा जोड दिनुभयो । वर्तमान सरकार विगतको निरन्तरता नभएको दावी गर्दै उहाँले संविधानको भावना अनुसारका नीति नियमहरु नभएका कारण काममा ढिलाई भएको बताउनु भयो । संविधानको मर्म अनुसारका काम गर्ने कानुनहरु निर्माण भैरहेको भन्दै उहाँले नीति नियम बनेपछि जनताले परिवर्तनको अनुभूति गर्ने गरी काम हुने दावी गर्नु भयो ।

उपप्रधानमन्त्री पोखरेलले बैंकको नवनिर्वाचित सञ्चालक समितिका पदाधिकारी सदस्यहरुलाई वधाई ज्ञापन सहित कार्यकाल सफलताको कामना गर्नु भएको बैंकका सञ्चालक रामबहादुर जिसीले जानकारी दिनुभयो ।   राष्ट्रिय सहकारी बैंकका नवनिर्वाचित अध्यक्ष के.बी.उप्रेतीले सहकारीलाई अर्थतन्त्रको तीन मध्ये एक खम्बाका रुपमा उल्लेख गरिए पनि सो अनुसारको व्यवस्थापनमा राज्यको ध्यान जान नसकेको भन्दै सहकारी क्षेत्रको प्रवद्र्धनमा सहयोग गर्न आग्रह गर्नु भयो ।

 

सहकारी क्षेत्रलाई उत्पादन, प्रशोधन र बजारीकरणमा केन्द्रीत गरी रोजगारी सिर्जना गर्न सहकारी बैंकले पहल प्रयत्न गरिरहेको भन्दै उहाँले थप प्रभावकारी बनाउनका लागि राज्यका तर्फबाट सहकारी क्षेत्रमा गरिने लगानी सहकारी बैंक मार्फत गर्न माग गर्नु भयो ।

Share This: