गरिबी निवारण गर्न राष्ट्रिय गरिबी नीति ल्याइदैं


काठमाडौं, मंसिर १० । सरकारले देशबाट गरिबी उन्मुलन गर्न राष्ट्रिय गरिबी नीति ल्याउने भएको छ । नीति निर्माणका लागि सहकारी तथा गरिबी निवारण मन्त्रालयले गृहकार्य शुरु गरेको छ ।
मन्त्रालयले देशबाट गरिबी उन्मुलन गर्न छिट्टै राष्ट्रिय गरिबी नीति बनाइसक्ने जनाएको छ । मन्त्रालयका प्रवक्ता सुरेश प्रधानले नीति निर्मणको चरणमा भएको बताउनुभयो । राष्ट्रिय गरिबी नीतिमार्फत केही वर्षभित्रै देशबाट गरिबी निवारण गर्न सरकारको लक्ष्य छ ।
नीति निर्माणका लागि सहकारी तथा गरिबी निवारण मन्त्रालय तीर्वगतिमा जुटेको छ । मन्त्रालयका प्रवक्ता प्रधानले नीति निर्माणका लागि छलफल तथा गोष्ठी भइरहेको बताउनुभयो । ‘राष्ट्रियरुपमा समेट्नेगरी नीतिको अभाव छ, अभाव पुर्ती गर्न हामी नीति बनाउन लागेका हौै’ उहाँले भन्नुभयो । मन्त्रालयले नीति निर्माणका लागि सरोकारवाला निकायसँग छलफलसमेत शुरु गरिसकेको छ ।
प्रवक्ता प्रधानले अहिले विभिन्न निकायबाट सञ्चालन भइरहेको नीति कलेक्सन गर्ने र समराजईज गर्ने काम सकिसकेको बताउनुभयो । ‘विभिन्न मन्त्रालयबाट गरिबसम्बन्धी कार्यक्रम सञ्चालन भइरहेका छन्, ती नीति पनि राष्ट्रिय नीतिमा समेटिने छन्’ उहाँले भन्नुभयो । नीतिका लागि सरोकारवाला निकायसँग छलफल भइरहेको छ । नीति निर्माण गरी एकीकृतरुपमा कार्यक्रम सञ्चालन गर्न सके मात्र छिट्टै गरिबी निवारण गर्न सकिने मन्त्रालयको अपेक्षा छ ।
अहिले प्रधानमन्त्री कार्यालयको मातहातबाट गरिबी निवारण कार्यक्रम, स्थानीय विकास मन्त्रालयबाट गरिबसँग विश्वेश्वरलगायत अन्य मन्त्रालयले गरिबीसँग सम्बन्धित केही कार्यक्रम सञ्चालन गरिरहेका छन् । नीतिले ती सबै कार्यक्रमलाई एकीकृत गर्ने र गरिबी निवारणमा अंहम भूमिका निर्वाह गर्ने मन्त्रालयले विश्वास लिएको छ ।
दुई तीन महिनाभित्र नीतिको मस्यौदा निर्माण गरिसक्ने प्रवक्ता प्रधानले जानकारी दिनुभयो । ‘आउँदो पुससम्म मस्यौदा बनाइसक्ने गरी काम गर्ने तयारीमा छौं’ उहाँले भन्नुभयो । मन्त्रालयले विभिन्न समूह बनाएर राष्ट्रिय नीतिबारे छलफल गर्ने भएको छ । त्यस्तै नीति निर्माणका लागि मन्त्रालयले जिल्लाजिल्लामा पुगेर समेत सरोकारवाला निकायसँग छलफल गर्ने जनाएएको छ ।
मन्त्रालयका सहप्रवक्ता सानुकाजी देसारले ग्रामीण गरिबी र शहरी गरिबीलाई छुट्टाछुट्टैरुपले सम्बोधन गर्ने गरी नीति बनाउन लागिएको बताउनुभयो । ‘गाउँ र शहरमा गरिबीको स्वरुप फरक छ, नीति बनाउँदा पनि फरक ढंगले बनाइने छ’ उहाँले भन्नुभयो । नीतिमा गाउँबाट गरिबी कसरी उन्मुलन गर्न सकिन्छ, शहरमा कस्ता कार्यक्रम सञ्चालन गर्न सकिन्छ लगायतका विषय समेटिने छ । सहप्रवक्ता देसारले नीति निर्माणपश्चात मन्त्रालयले गरिबी निवारणसम्बन्धी प्रभावकारी कार्यक्रम सञ्चालन गर्ने बताउनुभयो ।


प्र तिक्रिया दिनुहोस !

सम्बन्धित खबरहरु

ललितपुरमा साकोसहरुबीच असल सिकाई आदानप्रदान कार्यक्रम सम्पन्न
साकोसका नगद परिचालक तथा रिसेप्सनिष्टहरुको क्षमता विकास तालिम सम्पन्न
मिलिजुली कालिञ्चोक साकोसद्वारा क्यूआर कोड सेवा सुरु
पोखरामा सहकारीको संयुक्त रक्तदान कार्यक्रमः ६२ युनिट रगत संकलन