कानुनी व्यवस्था तथा बजारीकरण तालिम सम्पन्‍न


पनौती, काभ्रे । नेफ्स्कूनले व्यवसाय विकास सेवा कार्यक्रम अन्तर्गत काभ्रेको पनौतीस्थित सामुदायिक बचत तथा ऋण सहकारी संस्था लि. का १० जना महिला उद्यमी सदस्यहरुलाई लेखापालन, कानुनी व्यवस्था तथा बजारीकरण सम्बन्धी २ दिने तालिम प्रदान गरेको छ । तालिम आयोजना सामुदायिक साकोसले गरेको थियो भने प्राविधिक सहयोग एशियाली ऋण महासंघ र नेफ्स्कूनको रहेको थियो । बचत तथा ऋण सहकारी संस्थामा आवद्ध महिला सदस्यहरुलाई उद्यमी बनाउने अभिप्राय स्वरुप नेफ्स्कूनले आकूको सहयोगमा केही समय अघिदेखि यस प्रकारको तालिम सञ्चालन गर्दै आएको छ । सोही अनुरुप हिजो र आज सामुदायिक साकोसका १० महिला सदस्यहरुलाई उद्यमशीलताको परिचय, उद्यम छनौट, लगानीको वस्तुगत आँकलन, प्रतिफलको पूर्वानुमान, लेखा राख्‍ने विधि, योजना तर्जुमा, बजारीकरणका विविध तौरतरिका, प्रविधि र इकमर्श आदि विभिन्न विषयमा सहजिकरण गरिएको थियो ।

आज समापन समारोहमा बोल्दै सामुहिक साकोसका सञ्चालक सदस्य एवम् शिक्षा उपसमिति संयोजक मुकुन्दप्रसाद अर्यालले महिलाहरुले जानी रहेको कुरालाई व्यवस्थित, वैज्ञानिक र प्रविधिसँग जोडेर लग्दा सफलता हात पर्ने भन्दै यस किसिमको तालिमबाट व्यवहारिक रुपमा हासिल गरिने उपलब्धिबाट सस्थाका अरु सदस्यहरु पनि उत्प्रेरित र लाभान्वित हुने बताउनुभयो । उहाँले उद्यमशिलता आजको आवश्यकता भएको उल्लेख गर्नुभयो । कार्यक्रममा सामुदायिक साकोसका प्रमुख कार्यकारी अधिकृत मदन बस्‍नेतले तालिम समापन भएपनि औपचारिक रुपमा सिकाइ र कामको थालनी अब हुने भन्दै सिकाइलाई व्यवहारिक परिणति प्रदान गर्न आवश्यक भएको उल्लेख गर्नुभयो ।

उहाँले संस्थाका आधा भन्दा बढी हिस्सा ओगटेका महिला सदस्यहरुमध्येबाट तालिमका लागि १० जना छनौट गर्नु चुनौतीपूर्ण रहेको भन्दै यो अवसरलाई सदुपयोग गर्नुपर्नेमा उहाँले जोड दिनुभयो । प्रमुख कार्यकारी अधिकृत बस्‍नेतले भोलीका दिनमा तालिमबाट भएका सिकाइहरुको संस्था, नेफ्स्कून र आकूबाट समेत अनुगमन र निरिक्षण हुने भन्दै त्यसलाई ध्यानमा राखेर उद्यमलाई व्यवस्थित र अपेक्षाकृत उपलब्धि हासिल गर्ने दिशामा लाग्‍न सहभागीहरुलाई आग्रह गर्नुभयो । कार्यक्रमका सहभागीहरुले सिकेको कुराहरुलाई काममा जोड्ने प्रतिवद्धता व्यक्त गर्नुभएको थियो । नेफ्स्कूनकी कार्यक्रम अधिकृत रीता सुवेदी र सञ्चार अधिकृत रञ्‍जनमणि पौडेलले सहजिकरण गर्नुभएको तालिम कार्यक्रमको आजको समापन कार्यक्रम सञ्चालन संस्थाका समूह परिचालन अधिकृत अमित राज कर्णिकारले गर्नुभएको थियो ।


प्र तिक्रिया दिनुहोस !

सम्बन्धित खबरहरु

सूचना तथा सञ्चार प्रवाह कार्यशाला गोष्ठी सम्पन्‍न
धुलिखेलमा कोपोमिस तालिम सम्पन्‍न
चन्द्रागिरि साकोसको CUDCC तालिम सुरु
संस्थागत विकास तालिम सुरु