वित्तीय कानुनसम्बन्धी जनसचेतनको प्रशिक्षण


दोलखा । दोलखा जिल्ला कार्यक्षेत्र रहेको जनसचेतन बचत तथा ऋण सहकारी संस्था लि.ले कर्मचारीको क्षमता विकासका लागि सहकारी तथा वित्तीय कानुनका बारेमा एक दिने प्रशिक्षण कार्यक्रम सम्पन्न गरेको छ । संस्थाको मुख्य कार्यालय बैत्यश्‍वर गाउँपालिका ५ मैनापोखरीमा शनिबार आयोजित वित्तिय संस्थासँग सम्बन्धित कानुन तथा कानुनी सिद्धान्तका बारेमा प्रशिक्षण कार्यक्रममा दोलखा जिल्ला अदालतका जिल्ला न्यायाधीश कविप्रसाद न्यौपानेले मुख्य सहजीकरण गर्नुभएको थियो । सो अवसरमा जिल्ला न्यायाधीश न्यौपानेले धितो बन्दक र लिखत तयार गर्दा अपनाउनुपर्ने सबै प्रक्रियाका बारेमा सहभागीहरुलाई जानकारी गराउनुभएको थियो । सो अवसरमा उहाँले सहकारी ऐन विशिष्ट कानुन भएकोले सोही कानुनमा उल्लेख भए अनुसारका सबै प्रक्रिया पुरा गरी सहकारी संस्थाले आफ्ना शेयर सदस्यहरुलाई सेवा प्रवाह गर्नुपर्ने बताउनुभयो । सहकारी संस्थाले समुदायका गरिव विपन्न तथा सिमान्तकृत समुदायको जीवनस्तर माथि उकास्‍न काम गर्ने भएकाले सेवा प्रवाहमा व्यवहारिक भन्दा पनि कानुनी प्रक्रिया पुरा गर्नुपर्नेमा जोड दिनुपर्ने उहाँले बताउनुभयो ।

प्रशिक्षण कार्यक्रममा दोलखाका जिल्ला न्याधिवक्ता सविता शर्मा, सहायक जिल्ला न्याधिवक्ता बद्रीकुमार कार्की, जिल्ला अदालत दोलखाका श्रेष्तेदार सुमन कुशवाह र संस्थाका कानुनी सल्लाहकार अधिवक्ता राजेन्द्रनारायण श्रेष्ठले सेवा प्रवाहका क्रममा वित्तिय संस्था तथा सहकारी संस्थाहरुले पालना गर्नुपर्ने कानुनी प्रावधानका बारेमा सहभागीहरुलाई प्रशिक्षण दिनुभएको थियो । सो अवसरमा उहाँहरुले सहकारी संस्थाले मुख्य गरी बचत सङ्‍कलन र ऋण लगानीको कार्य गर्ने भएकोले बचत सङ्‍कलन र ऋण लगानीको क्रममा पालना गर्नुपर्ने कानुनी प्रावधानका बारेमा जानकारी दिनुभएको थियो । कार्यक्रमको अध्यक्षता सहकारी संस्थाका अध्यक्ष हेमन्तकुमार चौलागाईले गर्नुभएको थियो ।

अध्यक्षता ग्रहण गर्नुहुँदै चौलागाईले जनसचेतन सहकारी संस्थाले जिल्लाभरी १४ वटा सेवा केन्द्र मार्फत वाणिज्य बैकले दिने सरहको सुविधा आफ्ना शेयर सदस्यहरुलाई प्रवाह गरेको बताउनुभयो । सो अवसरमा उहाँले संस्थाले बचत सङ्‍कलन र ऋण प्रवाहका साथै रेमिट्‌यान्‍स सेवा लगायत अन्य सेवा प्रवाह गर्दै आएको बताउनुभयो । सो अवसरमा अध्यक्ष चौलागाईले सहकारीले समुदाय स्तरमा गैह्रवित्तिय सेवा समेत प्रवाह गर्दे आएको बताउँनुभयो । प्रशिक्षण कार्यक्रममा सहकारी संस्थाका पुर्व अध्यक्ष भीमप्रसाद दाहाल, वरिष्ठ उपाध्यक्ष गोपालध्वज श्रेष्ठ, उपाध्यक्ष स्वस्थानी कुँवर, सचिव कमल दाहाल लगायत अन्य सञ्चालक सहित ५० भन्दा बढी संस्थाका कर्मचारीहरुको सहभागिता रहेको थियो ।


प्र तिक्रिया दिनुहोस !

सम्बन्धित खबरहरु

नेफ्स्कून र जिल्ला बचत संघ बर्दियाबीच साझेदारी सम्झौता
पर्यटन सहकारी प्रवद्र्धन सम्‍बन्‍धी रणनैतिक योजना निर्माण
प्रारम्‍भिक साधारण सभा
सहकारी अभियन्ता योगराज पौडेलको निधन