बढ्यो काठमाडौं जिल्ला सहकारीको चुनावी सरगर्मीे


नेतृत्व हत्याउन अस्तित्वको लडाई

निर्वाचन तालिकामा हेरफेर, भोली नै निर्वाचन हुने

-तुलसी सुवेदी-


काठमाडौं जिल्ला सहकारी संघको १५ औं साधारणसभा भोली शुक्रबार हुदैँछ । आगामी पाँच वर्षसम्मका लागि नयाँ नेतृत्व चयन हुने भएकाले साधारणसभालाई विशेषरुपमा हेरिएको छ । नेतृत्व हत्याउनका लागि प्रजातान्त्रिक र वामपन्थी विचारधाराका सहकारीकर्मीबीच अस्तित्वको लडाई भएको छ । अझ प्रजातान्त्रिक सहकारीकर्मीको लागि विशेषरुपमै अस्तित्वको लडाई हो । त्यसकारण नेशनल कोअपरेटर्स एलाईन्सका लागि जिल्ला संघको चुनाव महत्वपूर्ण अवसर र चुनौति हो । त्यस्तै सहकारीक्षेत्रमा अहिलेसम्म आफ्नो पकड जमाएको वापमन्थी सहकारीकर्मीका लागि आफ्नो वर्चश्व कायम राखिराख्ने चुनौती रहेको छ ।

candidates names for FBbam pyanal - Copy
नयाँ नेतृत्व हत्याउनका लागि यतिखेर सहकारीकर्मीहरु चुनावी मैदानमा होमिएका छन् । नयाँ नेतृत्व हत्याउनका लागि खासगरी दुई समूह चुनावी परिणाम आफ्नो पक्षमा पार्न बढी क्रियाशील भईरहेका छन् । यस पटकको जिल्ला संघको चुनावमा दुवै पक्षबीच कडा प्रतिष्पर्धा हुने देखिएको छ । चुनावका लागि दुई पक्षले प्यानल नै घोषणा गरेर अघि बढेका छन् । एलाईन्सको सञ्जाल अलि बढी नै क्रियाशील रहेको छ । तर पनि चुनावमा मतदान नभईकनै कसले जित्छ भनि पहिला नैै ठोकुवा गर्न सकिदैंन ।
सहकारीका अन्य निकायहरुमा वामपन्थी विचारधाराका सहकारीकर्मीको वर्चस्व रहेको छ । राष्ट्रिय सहकारी संघ, नेपाल बचत तथा ऋण सहकारी केन्द्रीय संघ(नेफ्स्कुन), राष्ट्रिय सहकारी बैंकमा वामपन्थी त्यसमा पनि एमाले समर्थक सहकारीकर्मीको बाहुल्यता रहेको छ । तर यसपटक काठमाडौं जिल्ला सहकारी संघमा उसको त्यसरी अन्य निकायजस्तो (संघ, नेफ्स्कुन र बैंक)पहुँच कायमै रहन सक्ने अवस्था देखिदैँन ।
नेशनल कोअपरेटर्स एलाईन्स विगत दुई वर्षदेखि क्रियाशील रहदैं आएको छ । यो नितान्त प्रजातान्त्रिक विचार बोक्ने सहकारीकर्मीको संगठन हो । काठमाडौं जिल्ला संघमा अधिकांश सिट जित्ने उसको बलियो संभावना छ । आधा भन्दा बढी नै सिट ल्याउनेमा एलाईन्स सम्बद्व सहकारीकर्मीहरु ढुक्क छन् ।
एलाईन्सले सहकारी मुमेन्टमा आफ्नो अस्तित्व स्थापित गर्न अधिक मेहनत गरेको छ । राष्ट्रियदेखि स्थानीयतहसम्म विचार मिल्ने सहकारीकर्मीलाई एकीकृत गरी नेशनल कोअपरेटर्स एलाईन्स गठन गरेर एक हिसाबले आफ्नो शक्ती सञ्चय गरेको छ । यो स्वयम् एलाईन्स आफैं, वामपन्थी सहकारीकर्मी एवम् सबैलाई दिइएको गतिलो सन्देश पनि हो ।
तर म्याराथुन दौड बाँकी नै छ । चुनाव एकदमै कडा प्रतिष्पर्धा हुन सक्ने देखिन्छ । यसपटकको चुनावमा एलाईन्सले सम्मानजनक सिट जित्नेमा दुईमत नै छैन् । किनकी उसको संगठन बिस्तार र नेतृत्वका लागि हदैसम्मको प्रयासले संभावना बलियो भएको हो । काठमाडौैंमा एलाईन्सले दशवटै निर्वाचन क्षेत्रका आधारमा क्षेत्रीय समिति गठन गरेको छ । क्षेत्रीय संयोजक नै काठमाडौं जिल्ला सहकारी संघको नेतृत्वका लागि उम्मेदवार बनेका छन् । जसले गर्दा हरेक क्षेत्रबाट उनीहरुले आफ्नो पक्षमा सहजै मत ल्याउन सक्छन् । आफ्नो विचार मिल्नेसँग मात्र होइन, भोट क्रस गर्न सक्ने अब्बल उम्मेदवारहरु एलाईन्समा छन् । तर अघिल्ला पटक भएका सहकारीका चुनावहरुमा वामपन्थीहरुको जित भएकोले एलाईन्सले अपेक्षा गरेजति सिट लिन सक्नेमा शंका गर्न सक्ने ठाउँ पनि नभएको होइन ।
काठमाडौं जिल्ला संघको चुनावमा उम्मेदवारहरुको हैसियत दुवै प्यानलमा लगभग उस्तै उस्तै देखिन्छ । अधिकांश उम्मेदवारको सहकारीक्षेत्रमा स्थिति समान रहेकाले पनि चुनावमा कडा प्रतिष्पर्धा हुने देखिएको छ । तुलनात्मकरुपमा उम्मेदवारको हैसियत उस्तै उस्तै भएपनि एलाईन्सका उम्मेदवारको प्रारम्भीक सहकारीको तुलनात्मकरुपमा कारोबारको हिसाबले धेरै ठूलो छ । त्यस्तै उम्मेदवार छनोट गर्ने क्रममा पनि एलाईन्सले सामावेशी र सामानुपातिकतालाई विशेष ख्याल गरेको पाइन्छ । नेवार जातिको बाहुल्यता रहेको काठमाडौंमा पनि वामपन्थीको प्यानलमा नेवार समूदायका कोहीपनि उम्मेदवार छैनन् । यद्यपी, महिला र जनजातिको सवालमा भने दुवै पक्षले ख्याल पु¥याएका छन् ।
त्यस्तै वामपन्थीका केही उम्मेदवारहरु बैंक, नेफ्स्कुनको नेतृत्वमा रही आएका र एलाईन्सका उम्मेदवार बैंक तथा नेफ्स्कुनको चुनावमा सहभागी जनाइसकेका भएकाले चुनावमा कसरी जित्ने भन्ने कुरामा दुवै पक्षका उम्मेदवार उत्तिकै चनाखो भएका छन् । जसले गर्दा सभवतः जिल्ला संघको चुनावमा सहकारीका अन्य निकायजस्तो कोही पनि उम्मेदवारले लज्जास्पद हार बेहोर्नुपर्ने छैन ।
निर्वाचन तालिकामा १५, १६ गते चुनाव गर्ने उल्लेख गरिए पनि एकीकृत माओवादीसहित १९ दलीय मोर्चाको घोषित कार्यक्रमका कारण भोली १५ गते नै उद्घाटन र चुनावको कार्यक्रम सक्ने दुवै पक्षबीच आपसी सहमती भइसकेको छ । निर्वाचनको नयाँ सूचनाका अनुसार भोली बिहान ८ बजे उद्घाटन सत्र र ११ बजेदेखि निर्वाचन प्रक्रिया शुरु हुने भएको छ ।


प्र तिक्रिया दिनुहोस !

सम्बन्धित खबरहरु

नवलपुरमा कोपोमिस दाखिला तथा भाखा नाघेको ऋण व्यवस्थापन कार्यक्रम सम्पन्न
सुनसरीमा साकोसहरुबीच असल सिकाई आदान प्रदान
धनुषामा साकोसहरुका लागि वार्षिक कार्ययोजना तथा बजेट निर्माण तालिम सञ्चालन
सदस्य सम्बन्ध व्यवस्थापन तालिम सम्पन्न