महिला केन्द्रिय सहकारी संघको आवश्यकता छ


निर्मला श्रेष्ठ ः लेखा समीति सदस्य (जिल्ला सहकारी संघ काठमान्डौं)
१. हालै सम्पन्न जिल्ला संघको निर्वाचनमा फेरिपनि वामपन्थिहरुले नै बाजी मारे नि ? यो कार्यकालमा एलाईन्सको. उपस्थितिलाई कसरी आँकलन गर्न सकिन्छ ?
पक्कैपनि वामपन्थिहरुले बाजी मारेका छन् । यो स्वभाविक पनि हो, लामो समयदेखी वामपन्थिहरुले राज गरेको ठाउँमा यसपाली हामीले लडेरै थोरै भएपनि आफ्नो उपस्थिती जनाएका छौं । निश्चयपनि संख्याकै आधारले पनि उनीहरुले हामीलाई पेलेर जान अवश्य खोज्नेछन् । तर हामीले सहकारी क्षेत्रलाई वामपन्थिकरण हुनबाट रोक्नलाई नै एलाईन्सको स्थापना गरेका हौं । जिल्ला सहकारी संघ काठमान्डौलाई सहकारीका आधारभूत मूल्य र मान्यताभन्दा बाहिर गएर काम गर्न दिने छैनौं । हामी हाम्रो धार भन्ने भन्दापनि सहकारीको आफ्नै धारमा सहकारी हिँडोस भन्ने चाहना राख्दछौं र त्यसका लागि हामी सङख्याले न्यून भएपनि संघर्ष गरिरहने छौं ।
२.तपाई एक महिला सहकारीकर्मी, लामो समयदेखी सहकारी अभियानमा क्रियाशिल हुुनुहुन्छ, भन्दिनुहोस सहकारी अभियानले महिला सशत्तिकरणमा कत्तिको भूमिका खेलेको छ ?
निश्चय नै सहकारी अभियानले महिला सशत्तिकरणमा एकदमै महत्वपूर्ण भूमिका निर्वाह गरेको छ । हामी नेपाली नारी सबैभन्दा मुख्य कुरो त सामाजिक र मनोवैज्ञानिक कारणले नै पीछडिएका हौं । तर सहकारी अभियानको कारणले महिलाहरु समूहमा बसेर बहस गर्न सक्ने भएका छन् । अझ मुख्य कुरो त सहकारीहरुले महिला लक्षित गरेर विभिन्न सीपमूलक तालिमहरु प्रदान गर्नाले धेरै महिलाहरु आर्थिक रुपमा स्वावलम्ब बनेका छन् र मलाई लाग्छ यदि सबै महिलाहरु आर्थिक रुपमा स्वावलम्ब बन्न सकेको खण्डमा मनोवैज्ञानिक रुपमै उनीहरु दरो हुनेछन् र सीप र क्षमता भएको खण्डमा कुनैपनि निर्णायक तहमा जानलाई स्वतः बाटो खुल्ला हुनेछ ।
३.समग्र राष्ट्रिय सहकारी अभियानमा महिला सहकारीकर्मीको भूमिकालाई प्रष्ट्याईदिनुहोस न ?
सहकारी क्षेत्रमा सदस्यताको हिसाबले हेर्ने हो भने महिलाहरुको उपस्थिती सङख्यात्मक रुपमा पुरुषहरुकोभन्दा ज्यादा पाईन्छ, महिला सहकारीहरु पनि थुप्रै खुलिसकेका छन् तर यर्थाथमा महिलाहरु प्रयोग भईरहेका छन् । उत्साहका साथ महिलाहरु सहकारी क्षेत्रमा लागेता पनि उनीहरुलाई खुल्ला रुपले बाटो खोलिएको अवस्था छैन् । त्यसकै परिणाम स्वरुप महिलाहरु सहकारी अभियानमा केन्द्र स्थानमा झुल्कन सकेका छैनन् । अलिअलि छिटपुट देखिएका अनुहारहरु आरक्षणभित्र परेर आएका हुन् । तर्सथ क्षमता हुँदाहुदैपनि महिलाहरु अन्य क्षेत्रमा जस्तै सहकारी क्षेत्रमा पनि पर्दा पछाडि नै छन् ।
४. तपाइहरुले धेरै पहिलेदेखी महिला सहकारीहरुको केन्द्रिय संघ चाहिन्छ भन्दै आइरहनुभएको छ, किन आवश्यक छ महिलाको अलग्गै केन्द्रिय संघ ?
हो, हामीले धेरै पहिलेदेखी यसको लागि पहल गरेका हौं तर सहकारी ऐनले नै लैङिगकताको आधारमा संघलाई बन्देज गरेको रहेछ । जुन एकदम अस्वभाविक छ । यहाँ तरकारी उत्पादक केन्द्रिय संघ हुँदाहुँदै प्याज संघ चाहिँ हुन हुने, तर देशभर यति धेरै महिला सहकारीहरु छन्, उनीहरुले आफ्नो छुट्टै संघ नपाउने यो अचम्मको कुरो छ । महिला सहकारीकर्मीहरुलाई एकताबद्ध गरी उनीहरुको क्षमता अभिवृद्धि गर्न र सहकारी अभियानको केन्द्रिय भूमिकामा आरक्षितभन्दा बढि महिलालाई समावेश गराउन पनि महिला केन्द्रिय संघको आवश्यकता छ ।
५.ऐन संसोधनको संघारमा छ भनिन्छ नि , संसोधित ऐनमा यसलाई सुरक्षित गर्न सकिएला नि त ?
ऐन संसोधनको हल्ला चलिरहेकै छ र हामी पनि यसकै पर्खाइमा छौं । संसोधित ऐनमा महिलाहरुको अलग्गै केन्द्रिय संघ खोल्न पाउने प्रावधान हुनुपर्छ । हामीले सरोकारवाला निकाय तथा व्यक्तिहरुलाई यस विषयमा पटक पटक भनिराखेकै छौं । उहाँहरु सकारात्मक देखिनुहुन्छ । तर मुखले हुन्छ भन्ने र व्यवहारमा उल्टो गर्ने परिपाटी हामीकोमा छ, ढुक्क भएर बस्ने अवस्था छैन् । यसको सुनिच्तिताको लागि हामीले देशभरका महिला सहकारी संस्थाबाट हस्ताक्षर संकलन फेरि पनि बुझाउने छौं र विभिन्न दबावमूलक कार्यक्रम पनि गर्ने छौं । अन्त्यमा नजिकिँदै गरेको राष्ट्रिय सहकारी दिवसको अवसरमा सम्पूर्ण सहकारीकर्मी साथीहरुलाई सहकारीलाई उत्पादनमुखी क्षेत्रमा डोराउन आफ्नो आफ्नो ठाउँबाट पहलकदमी लिनुहुन आग्रह गर्दछु ।


प्र तिक्रिया दिनुहोस !

सम्बन्धित खबरहरु

प्रोबेसन कार्यक्रम अन्तर्गत गौरीशंकर क्लष्टरमा आबद्ध साकोसहरुबीच असल सिकाई आदान प्रदान
कैलालीको बर्दगोरियामा सहकारी व्यवस्थापन तालिम सञ्चालन
नवलपुरमा कोपोमिस दाखिला तथा भाखा नाघेको ऋण व्यवस्थापन कार्यक्रम सम्पन्न
सुनसरीमा साकोसहरुबीच असल सिकाई आदान प्रदान