नेफस्कूनको एकीकृत साकोस प्रणाली एवम् लेखामान लागु गर्ने तयारी


काठमाडौं, साउन ३० । नेपाल बचत तथा ऋण केन्द्रीय सहकारी संघ लिमिटेड (नेफ्स्कून) ले आफना सदस्य संघसंस्थाहरुमा एकीकृत साकोस प्रणाली र लेखामान लागु गर्ने भएको छ ।

आज नेफ्स्कूनले अर्थ मन्त्रालय, कानून मन्त्रालय, सहकारी तथा गरीवी निवारण मन्त्रालय, सहकारी विभाग, नेपाल राष्ट्र बैंक, नेपाल चार्टर्ड एकाउण्टेण्टस संस्था (आइक्यान), नेपाल अडिटर्स एशोसिएशन (अडान) र नेफ्स्कून प्रतिनिधिहरुवीच आयोजित अन्तरक्रिया कार्यक्रममा एकीकृत प्रणाली र लेखामानको तयारी भइरहेको बताइएको थियो ।
कार्यपत्र प्रस्तुत गर्दै नेफ्स्कूनका कार्यकारी अधिकृत शिवजी सापकोटाले सहकारी सुशासन, अनुशासन र व्यवस्थापनका लागि नीतिगत केन्द्रीयता र सञ्चालन स्वायत्तताको अवधारणामा नीति, विधि, प्रविधि र शैलीमा मुलुकभर एउटै स्वरुपमा सञ्चालन गर्ने तयारी भई रहेको बताउनुभयो । चांडै नै लेखामान, साइनबोर्ड, रंग र लेटरप्याड आदिबाट एकीकृत साकोस प्रणाली लागु गर्ने सापकोटाले बताउनुभयो ।
सहकारीहरुको लेखा कोड र फम्र्याट प्रस्तुत गर्दै आइक्यानका एफसिए सुमन डंगोलले वित्तिय सहकारीहरुलाई नियमन गर्नका लागि लेखा पद्धतिलाई प्रभावकारी बनाउन जरुरी रहेको बताउनु भयो ।
कार्यक्रममा बोल्दै प्रमुख अतिथि एवम् राष्ट्रिय सहकारी संघका अध्यक्ष एवम् संविधानसभा सदस्य केशव बडालले तत्काल सहकारी ऐन ल्याएर सहकारीका अवसर र चुनौतिको व्यवस्थापन गर्न जरुरी रहेको बताउनुभयो ।
सहकारी तथा गरीवी निवारण मन्त्रालयका निमित्त सचिव सुरेश प्रधानले नेफ्स्कूनले जारी गर्न खोजेको लेखा ढांचा र सूचि सहकारी क्षेत्रको सुदृढीकरणको आधार बन्ने र त्यसका लागि मन्त्रालयले सहयोग गर्ने बताउनुभयो ।
सहकारी विभागका रजिष्ट्रार काशिनाथ मरासिनीले सहकारी क्षेत्रका समस्याहरु समाधानका लागि अभियान गम्भिर र जिम्मेवार हुनुपर्ने बताउनुभयो ।
अर्थ मन्त्रालयका उपसचिव कुलप्रसाद चुंडालले सहकारीले नेपाली अर्थतन्त्रको विकासमा महत्वपूर्ण योगदान रहेको बताउदै सहकारी असफल हुदा मुलुकको अर्थतन्त्रसमेत असफल हुने बताउनुभयो । कानून मन्त्रालयका उपसचिव इन्दिरा दाहालले प्रस्तावित सहकारी ऐनमा विशेष परिच्छेद थपेर वा छुटै ऐन व्यवस्था गरेर भएपनि वित्तिय सहकारीको नियमन प्रभावकारी बनाउन जरुरी रहेको बताउनुभयो ।
नेपाल राष्ट्र बैंकका निर्देशक डा. बिनोद आत्रेयले सहकारी क्षेत्रले ठुलो मात्रामा वित्तिय परिचालन गरिरहेकोले यसको सुशासन र नियमन आफुहरुको पनि चासोको विषय रहेको बताउनुभयो ।
नेपाल चार्टर्ड एकाउण्टेण्टस संस्था (आइक्यान) का अध्यक्ष प्रकाश लम्सालले विशेषतः सहकारी क्षेत्रमा जोखिमहरु बढदै गएको र त्यसमा प्रत्यक्ष अप्रत्यक्ष रुपमा लेखापरीक्षकहरु पनि जोडिनु दुखदायी भएको बताउदै काम र गुणस्तरीयताको लागि शुल्क वृद्धि गर्नुपर्ने बाध्यता परेको बताउनुभयो ।
नेपाल अडिटर्स एशोसिएशन (अडान) का सचिव ध्रुव पौडेलले सहकारी क्षेत्रको लेखापरीक्षण चुनौतिपूर्ण रहेको बताउदै लेखापरीक्षकहरुले जोखिममा काम गरिरहनुपरेको बताउनुभयो ।
नेफ्स्कून अध्यक्ष ऋषिराज घिमिरेले वित्तिय सहकारीहरुवीच एकरुपता कायम गर्न एकीकृत साकोस प्रणाली लागु गर्न खोजेको र यसका लागि सरकारले पहलकदमी लिनुपर्ने बताउनुभयो ।


प्र तिक्रिया दिनुहोस !

सम्बन्धित खबरहरु

मकवानपुरमा सहकारी लक्षित बार्षिक योजना तथा बजेट निर्माण तालिम सम्पन्न
कोपोमिसमा समष्टिगत विवरण दाखिला सम्बन्धी अभिमुखिकरण सम्पन्न
हरिवन नगरपालिकामा सहकारी सचेतीकरण कार्यक्रम सम्पन्न
घोराहीमा साकोसहरुका लागि वार्षिक योजना तथा बजेट निर्माण तालिम सञ्चालन