पत्रकार घिमिरे ‘सिजेएन पत्रकारिता पुरस्कार २०७२’ बाट सम्मानित


नेपाल सहकारी पत्रकार समाजको स्थापना दिवस

काठमाडौं, । नेपाल सहकारी पत्रकार समाज(सिजेएन)ले आफ्नो पाचौं स्थापना दिवस मनाएको छ । दिवस सहकारी तथा गरिबी निवारण मन्त्रालयका सचिव शंकरप्रसाद अधिकारीको प्रमुख आतिथ्यमा सम्पन्न भएको थियो । सो अबसरमा सिजेएनले रिपब्लिका राष्ट्रिय दैनिकका पत्रकार सागर घिमिरेलाई सिजेएन पत्रकारिता पुरस्कार २०७२ बाट सम्मान गरेको छ । घिमिरेलाई नगद पाँच हजार सहित कदरपत्रले सम्मान गरिएको थियो ।
कार्यक्रममा बोल्दै सचिव शंकरप्रसाद अधिकारीले सहकारीको गुणात्मक विकासका लागि मर्जरमा अनिवार्य जानुपर्ने बताउनुभयो । सहकारीको गुणात्मक विकास र सुधारका लागि मेकानिजम र फोर्स नीति अबलम्बन गर्न लागिएको बताउनुभयो । ‘सहकारी एकीकरण नीति ड्राफ्ट गर्दछौं’ उहाँले भन्नुभयो । नीति बनेपछि सहकारी मर्जमा जान सजिलो हुने उहाँको भनाई थियो ।
हालसम्म ३३ हजार सहकारी दर्ता भएपनि मर्ज नीति प्रभावकारी नहँुदा समस्या भएको उहाको भनाई थियो । सहकारीको विकासका लागि अब बन्ने सहकारी ऐनमा दण्ड र कैदमा जोड दिइएको सचिव अधिकारीले बताउनुभयो । सहकारी ऐन २०४८ मा दण्डात्मक व्यवस्था नभएकाले केही सहकारीमा विकृति बढेको उहाँको भनाई थियो ।
समस्याग्रस्त सहकारीको व्यवस्थापन र समस्या समाधान गर्ने संयन्त्र बनाउन लागिएको सचिव अधिकारीले जानकारी दिनुभयो। कुल ग्राहस्थ उत्पादनमा सहकारीको योगदानबारे अध्ययन हुन नसकेको भन्दै सचिव अधिकारीले आउँदो आर्थिक वर्षदेखि अध्ययन गरिने बताउनुभयो । तीन खम्बे नीतिमार्फत नै अर्थतन्त्र सबल हुने भएकाले सहकारी सक्षम बन्न आवश्यक भएको उहाँको भनाई थियो ।
सहकारी नीति २०६९ कार्यान्वयनमा ल्याउनका लागि एक्सन प्लान बनाउने काम अन्तिम चरणमा पुगेको सचिव अधिकारीले बताउनुभयो । २५ जिल्लामा गरिबी परिवारबारे अध्ययन भएको र आउँदो वर्ष थप ५० जिल्लामा गरिब परिवारे अध्ययन गरिने सचिव अधिकारीले बताउनुभयो । गरिबी निवारणसम्बन्धी सबै काम मन्त्रालयमार्फत गर्न सके प्रभावकारी ढंगले सञ्चालन गर्न सकिने उहाँको भनाई थियो । सहकारीको सूचना व्यवस्थापनका लागि सफ्टवेयर निर्माण भइसकेको उहाँको भनाई थियो ।

राष्ट्रिय सहकारी संघका वरिष्ठ उपाध्यक्ष मीनराज कडेलले कर्जा सूचना केन्द्र निर्माणका लागि सरोकारवाला निकायको छुट्टै संयन्त्र बनाउनुपर्ने बताउनुभयो । ‘कर्जा सूचना केन्द्रको काम निजी कम्पनीलाई दिने चलखेल भइरहेको छ, यदी त्यसो भए हामीलाई स्वीकार्य हुने छैन्’उहाँले भन्नुभयो–‘यदी त्यसो भएमा अभियानको साथ, सहयोग र समर्थन सरकारलाई रहने छैन् ।’
सहकारी विभागका रजिष्ट्रार काशिनाथ मरासिनीले सहकारी सुरक्षित, मर्यादित बनाउन आवश्यक भएको बताउनुभयो । ‘सहकारीको साख गिर्न दिनुहुन्न, सहकारीको सिद्वान्त राम्रो भएपनि केही सहकारी सहकारी सिद्वान्त विपरित चलेका छन्’ उहाँले भन्नुभयो ।
नेपाल बचत तथा ऋण केन्द्रीय सहकारी संघ(नेफ्स्कुन)का अध्यक्ष ऋषिराज घिमिरेले सहकारीको गुणत्मक विकासका लागि सहकारी एकीकरणमा दवावमुलक कार्यक्रम नै सञ्चालन गर्न आवश्यक रहेको बताउनुभयो ।
नेपाल आर्थिक पत्रकार समाज(सेजन)का अध्यक्ष गोकर्ण अवस्थीले सहकारीका विकृति, विसंगती अन्त्य गर्न कलम चलाउन आवश्यक भएको बताउनुभयो । सहकारी गाउँ केन्द्रित हुन सकेमात्र अर्थतन्त्रमा सहकारी सबल खम्बा बन्न सक्ने उहाँको भनाई थियो ।
नेपाल सहकारी पत्रकार समाजका संस्थापक अध्यक्ष यादव हुमागाईले सहकारी अभियान पारदर्शी र सञ्चारमैत्री हुन नसक्दासम्म अर्थतन्त्रको सबल खम्बा बन्न नसकेको बताउनुभयो ।
कार्यक्रममा सिजेएनका उपाध्यक्ष राजेश खनालले स्वागत मन्तव्य दिनुभएको थियो । कार्यक्रमको सञ्चालन सचिव खिला दाहालले गर्नुभएको थियो ।


प्र तिक्रिया दिनुहोस !

सम्बन्धित खबरहरु

नवलपुरमा कोपोमिस दाखिला तथा भाखा नाघेको ऋण व्यवस्थापन कार्यक्रम सम्पन्न
सुनसरीमा साकोसहरुबीच असल सिकाई आदान प्रदान
धनुषामा साकोसहरुका लागि वार्षिक कार्ययोजना तथा बजेट निर्माण तालिम सञ्चालन
सदस्य सम्बन्ध व्यवस्थापन तालिम सम्पन्न